CƏMİYYƏT

Azərbaycanda ilk dəfə “Zəfər” tibb simpoziumu keçiriləcək

Azərbaycanda ilk dəfə olaraq Səhiyyə Nazirliyi, Diasporla İş üzrə Dövlət Komitəsi və Almaniya-Azərbaycan Radioloji və Neyroradioloji Cəmiyyətinin təşkilatçılığı və xüsusi dəstəyi ilə “Zəfər” tibb simpoziumu keçiriləcək.

Diasporla İş üzrə Dövlət Komitəsindən mediaya bildirilib ki, simpozium tibb tariximiz üçün maraqlı və əhəmiyyətli hadisədir. “Zəfər” tibb simpoziumunda Almaniya modeli nümunəsində müasir serebrovaskulyar mərkəzin təşkilinin əhəmiyyəti, insult mərkəzlərinin təşkili və radiologiya sahəsindəki ən müasir təcrübələrdən söhbət açılacaq. Tədbirdə Almaniyadan gələn qonaqların müəllifi olduğu ən son elmi yeniliklər iştirakçıların və ictimaiyyətin diqqətinə çatdırılacaq.

Simpoziumda Almaniya–Azərbaycan Radioloji və Neyroradioloji Cəmiyyətinin sədri, Almaniya Azərbaycanlıları Alyansının (AAA) İdarə Heyətinin sədr müavini, Köln Universitetinin tibb elmləri doktoru, Köln Universitet Klinikasının Radiologiya İnstitutunun şöbə müdiri və İnstitutun işemik insult araşdırmaları mərkəzinin rəhbəri Nuran Abdullayev insult xəstələrinin müalicəsi ilə bağlı uğurla icra etdiyi ən son yeniliklərdən danışacaq.

Bohum Universitet Klinikasının şöbə müdiri, tibb elmləri doktoru Volker Mausun əməliyyat texnikasında etdiyi son yeniliklər və Münhen Klinikasının Radiologiya va Neyroradiologiya Institutunun direktoru, professor Anastasios Mpotsarisin beyin anevrizmalarının damardaxili müalicəsində etdiyi ən son yeniliklər barədə məlumat veriləcək.

Simpozium oktyabrın 28-dən noyabrın 1-dək Bakı, Gəncə və Göygöl şəhərlərində keçiriləcək.

 

T.Rüstəmov