GÜNDƏM

Hikmət Hacıyev: Üçtərəfli görüşlər hələ davam edir, müəyyən müsbət dinamika var

“Qalib xalq olaraq bundan sonra da uğurla yaşayacağıq.” Bu sözləri Azərbaycan Prezidentinin köməkçisi Hikmət Hacıyev Türkiyənin “Haber Global” telekanalına açıqlamasında deyib:

    “Cənab prezidentimizin niyyəti budur ki, ən qısa zamanda, ləyaqətli, güvənli formada məcburi köçkünlərimizin ata-baba yurdlarına qovuşması həyata keçsin. Bu gün Azərbaycan minalarla çirklənmə səviyyəsinə görə dünyada, bəlkə də, 10 dövlətdən biridir. Ermənistan ya bilərək, ya da bilməyərəkdən bizə dəqiq mina xəritələrini vermir. Ona görə də hər bir yeri yenidən axtarmaq məcburiyyətində qalırıq.

Beynəlxalq münasibətlərdə Ermənistanın hərbi cinayətlərinin unudulması istiqamətində siyasət aparılır, amma təbii ki, Azərbaycan xalqı və dövləti olaraq biz bunu unutmamışıq. Bunlar hərbi cinayətdir və buna görə Ermənistanın hərbi rəhbərliyi məsuliyyət daşıyır. Bundan sonra da bu istiqamətdə səylərimizi davam etdirəcəyik..

Üçtərəfli görüşlər hələ davam edir, müəyyən müsbət dinamika var, amma hesab edirik ki, hələ yekun nəticədən danışmaq tezdir. Ona görə ki, hələ Ermənistan tərəfindən atılmalı olan bir sıra müsbət addımlar var.”

 

   İranla bağlı son hadisələrə diqqət çəkən siyasətçi qeyd edib ki, Azərbaycan müstəqil, öz milli maraqları əsasında siyasətini həyata keçirən ölkədir: “Azərbaycan kiminsə təzyiqini və diktə ilə danışmasını qəbul edəcək bir ölkə deyil.”

 

T.Rüstəmov