İDMAN

Avstriya millisinin Bakıda keçiriləcək dünya çempionatı üçün heyəti açıqlanıb

 

Noyabrın 18-21-də Bakıda ilk dəfə batut gimnastikası üzrə dünya çempionatı təşkil olunacaq.

AZƏRTAC xəbər verir ki, ilkin qeydiyyat siyahısına əsasən, 33 ölkə yarışda iştirakını təsdiqləyib.

Artıq Avstriya millisinin dünya çempionatı üçün heyəti açıqlanıb. Belə ki, Avstriyanı 2 gimnast – Niklas Froeşl və Benni Vizani təmsil edəcək.

Dörd gün davam edəcək çempionatda gimnastlar batut üzərində fərdi və sinxron tullanışlar, tamblinq və ikili minibatut üzrə proqramlarda çıxış edəcəklər. Bundan əlavə, komanda hesabında qaliblər müəyyənləşəcək.

Yarışların ilkin cədvəlinə əsasən, ilk iki gün təsnifat, sonuncu iki gün isə finallar keçiriləcək. Qaydalara əsasən, bir iştirakçı bir neçə proqramda çıxış edə bilər.

Çempionatda hər bir proqram üzrə təsnifat və final mərhələləri baş tutacaq.