GÜNDƏM

Azərbaycan və Qırğızıstan arasında nəqliyyat sazişi imzalanacaq

Azərbaycan və Qırğızıstan nəqliyyat sahəsində hökumətlərarası saziş imzalamağı planlaşdırır. Bunu mediaya Qırğızıstanın Azərbaycandakı səfiri Kayrat Osmonaliyev deyib. Diplomat bildirib ki, Qırğızıstanın Nəqliyyat və Kommunikasiyalar Nazirliyi ilə Azərbaycanın Rəqəmsal İnkişaf və Nəqliyyat Nazirliyinin nümayəndələri arasında keçirilmiş videokonfrans zamanı beynəlxalq avtomobil və hava əlaqəsi barədə hökumətlərarası saziş layihələri, Bakı-Bişkek aviareysinin bərpası, eləcə də nəqliyyat kommunikasiyaları sahəsində əməkdaşlığın inkişafı məsələləri müzakirə olunub: “Eyni zamanda biz avtomobil nəqliyyatı ilə ikitərəfli tranzit daşımalarına icazə blanklarına tətbiq olunan kvotanın artırılması, Azərbaycan tərəfi ilə Trans-Xəzər Beynəlxalq Nəqliyyat Dəhlizi sahəsində təcrübə mübadiləsi məsələlərini müzakirə etmişik.” Səfir əlavə edib ki, bu cür əməkdaşlıq mexanizminin Azərbaycan və Qırğızıstanın digər strukturları arasında da yaradılması planlaşdırılır.

T.Rüstəmov