Alyaskadakı (ABŞ) Katmay Milli Parkı və Qoruğunda hər il keçirilən Kök Ayı Həftəsi başa çatıb. Müsabiqədə ötən ilki kimi bu il də “Qreyzer” adlı ayı qalib gəlib. Bu kök nəhəng, uzunmüddətli rəqibi və acgözlüyü ilə qoruğun tarixinə düşən Çank da daxil olmaqla digər iştirakçıları geridə qoyaraq, çəki artırmaqda bacarıqlarını yenidən nümayiş etdirib.
Oxu.Az-ın UPI portalına istinadla verdiyi məlumata görə, ictimaiyyətin səsverməsi ilə müəyyən edilən müsabiqə, Katmaydakı qonur ayıların uğurlu yaşamasının simvolu hesab edilir.
“Bu bayram bu möhtəşəm heyvanların dözümlülüyünü, uyğunlaşma qabiliyyətini və gücünü vurğulayır”, – təşkilatçılar qeyd etdilər.
Alyaska qonur ayıları nəhəng ölçüləri ilə tanınır. Erkəklər 600 kiloqramdan çox çəkiyə malik ola bilər ki, bu da onları dünyanın ən böyük quru yırtıcılarından biri edir. Bu kütləni toplamaq üçün ayılar böyük miqdarda qida, əsasən Alyaska çaylarında bol olan qızıl balığı istehlak etməlidirlər.
