Avropa Futbol Assosiasiyaları İttifaqının (UEFA) “Qarabağ”ın avrokubok oyununu idarə etmiş polşalı baş hakim Bartoş Frankovskini 2025-ci ilə qədər diskvalifikasiya edib.
Oxu.Az xəbər verir ki, buna referinin digər həmkarı Tomaş Musyalla birgə içkili halda yol nişanlarına zərər yetirməklə qeyri-etik davranışları səbəb olub.
Onlar cari mövsümün əvvəlində Çempionlar Liqasının III təsnifat mərhələsinin “Reyncers” (Şotlandiya) – “Dinamo” (Kiyev, Ukrayna) oyununa VAR hakimləri kimi təyinat alıblar. Lakin etdikləri hərəkətlərə görə başqa hakimlərlə əvəzləniblər.
Hər iki ədalət qoruyucusu nizam-intizam qaydalarını pozduğuna görə UEFA tərəfindən 2025-ci ilin iyun ayına qədər hakimlikdən uzaqlaşdırılıblar.
Qeyd edək ki, Bartoş Frankovski 2022-ci ildə “Qarabağ” və Fransanın “Marsel” komandaları arasında keçirilən UEFA Konfrans Liqasının pley-off mərhələsinin cavab qarşılaşmasının baş hakimi olub.
