ABŞ-nin Los-Anceles şəhərində şiddətli yanğınlar zamanı ölkənin məşhurları da böyük itkilər yaşayıblar.
Entoni Hopkins, Ceff Bridces və Peris Hilton da daxil olmaqla, bir çox ulduzun evi yanaraq kül olub, bəziləri möcüzəvi şəkildə xilas ola biliblər.
Bu barədə Oxu.Az Türkiyə KİV-ə istinadən xəbər verir.
Sağ qalanlardan biri də məşhur aktyor Ben Afflek olub. Afflek yanğın nəticəsində məhv olan məhəlləsini çarəsiz şəkildə izləyib, daha sonra uşaqlarına qovuşmağın sevincini yaşayıb. Keçmiş həyat yoldaşı Cennifer Qarnerlə birlikdə evini boşaldan aktyor böyük qızı Vayoleti qucaqlayaraq ona təsəlli verib. Cennifer Qarner isə öz evi yanğından xilas olsa da, dostlarından birini itirməyin acısını yaşayıb.
Qeyd edək ki, Böyük Britaniya şahzadəsi Harri və Meqan Markl cütlüyü də yanğından zərər çəkənlər arasındadır. Onlar malikanələrinin həyətini çətin vəziyyətdəki qonşularına açaraq yardım əli uzadıblar.
Los-Anceles yanğınsöndürmə xidməti 100 mindən çox insanın hələ də təxliyə əmri altında olduğunu bildirib və evlərinə qayıtmaq istəyənlərə yanğın baş verən ərazilərin çox təhlükəli olduğu ilə bağlı xəbərdarlıq edib.
