Ukrayna Prezidentinin Ofisinin rəhbəri Andrey Yermak Vaşinqtonda ABŞ-nin Ukrayna və Rusiya üzrə xüsusi nümayəndəsi Keyt Kelloqla görüşüb.
“Report”un xəbərinə görə, A.Yermak bu barədə özünün teleqram kanalında məlumat verib.
“Cəbhədəki vəziyyəti, İstanbuldakı görüşlərin nəticələrini, Rusiyaya qarşı sanksiyaların gücləndirilməsinin vacibliyini və Ukraynaya müdafiə yardımını müzakirə etdik”, – o yazıb.
Bundan başqa, onun sözlərinə görə, tərəflər Rusiyanın ukraynalı uşaqları geri qaytarması məsələsini müzakirə ediblər: “Biz Rusiyaya siyahıları vermişik, cavab gözləyirik – onların evə qaytarılması vacibdir. Bu, mühüm məsələdir, biz ABŞ-nin prosesdə iştirakını yüksək qiymətləndiririk”.
Yermak Kelloqa onu da bildirib ki, Ukrayna rəhbərliyinin fikrincə, Rusiya müharibəni davam etdirmək üçün əlindən gələni edir və buna görə də ona güc yolu ilə son qoymaq lazımdır.
“Ancaq Rusiya atəşi könüllü dayandırmasa, biz əməliyyatlar keçirməyə və onların hərbi potensialını məhv etməyə məcburuq. Biz ABŞ Prezidenti Donald Trampa və bütün Amerika xalqına, hər iki tərəfə Ukraynanı dəstəklədiklərinə görə minnətdarıq”, – Yermak vurğulayıb.
Mənbə: Report.Az
Comments are closed.