Serbiya milli nüvə proqramının dinc məqsədlər naminə həyata keçirilməsi üçün hazırlıqlara başlayıb.
“Report”un “Veçernje Novosti” qəzetinə istinadən məlumatına görə, bunu ölkənin dağ-mədən və energetika naziri Dubravka Cedoviç-Handanoviç “Vinça” Nüvə Elmləri İnstitutunun nümayəndələri ilə görüşündə deyib.
“Serbiya enerji haqqında qanuna dəyişiklik etməklə nüvə enerjisini dinc məqsədlər üçün inkişaf etdirmək imkanını açdı, çünki biz enerji təhlükəsizliyinin gələcəyi haqqında düşünməliyik. Bu, kadr bazasının möhkəmləndirilməsi olmadan mümkün deyil, bunun üçün yaxşı təməlimiz var, lakin biz onu daha da gücləndirmək istəyirik və “Vinç” İnstitutunu ölkəmizdə nüvə proqramının yaradılması üçün təməlin bir hissəsi kimi tanıdıq.
Mədən və Enerji Nazirliyi, hökumət adından nüvə proqramı həyata keçirəcək bir qurum olaraq, nüvə enerjisi ilə bağlı xüsusi sektorun yaradılması üzərində işləyir”, – o deyib.
“Vinça” İnstitutunun direktoru Slavko Dimoviç qeyd edib ki, institut Serbiyanın nüvə proqramına elmi və təhsil baxımından rəhbərlik etmək istəyir: “Məqsədimiz nüvə enerjisindən dinc məqsədlərlə istifadə sahəsində regional təhsil mərkəzi olmaqdır. Biz həmçinin institutda nüvə enerjisi ilə bağlı müxtəlif sahələrdən olan institutdan və ondan kənarda olan mütəxəssisləri birləşdirəcək ekspert komissiyası yaratmışıq”.
Mənbə: Report.Az
Comments are closed.