Pep Qvardiola “Mançester Siti”dən ayrıldıqdan sonra karyerasına fasilə verəcək

İspaniyalı mütəxəssis Pep Qvardiola İngiltərənin “Mançester Siti” klubundan ayrıldıqdan sonra karyerasına fasilə vermək niyyətindədir.

“Report” xəbər verir ki, bu barədə o, “GQ Espana” jurnalına danışıb.

Ötən il “şəhərlilər”lə olan müqavilə müddətini 2027-ci ilin sonuna qədər uzadan baş məşqçi komandadan getdikdən sonra özünə istirahət verəcəyini söyləyib.

“Bilirəm ki, “Mançester Siti”dən sonra dayanacağam, buna artıq qərar vermişəm. Nə qədər işsiz qalacağımı bilmirəm: bir il, iki il, üç, beş, 10, 15. Bir az özümə diqqət edəcəyəm və özümə vaxt ayıracağam. Sonrakı illərdə olan planım barədə nəsə deyə bilməyəcəm”, – deyə o bildirib.

Qeyd edək ki, 54 yaşlı Qvardiola 2016-cı ilin yayından “Mançester Siti”ni çalışdırır. Onun rəhbərliyi altında klub 6 dəfə İngiltərə çempionu, 4 dəfə İngiltərə Liqa Kuboku, 3 dəfə İngiltərə Superkuboku, 2 dəfə İngiltərə Kuboku, 1 dəfə Çempionlar Liqası, 1 dəfə UEFA Superkuboku və 1 dəfə Klublararası Dünya Çempionatının qalibi adını qazanıb.