Həkim kimi adı siyahıda olmadı – Bu yola əl atdı-Yenilənib

Adı plastik cərrah kimi işləməyə icazəsi olan həkimlərin siyahısına daxil edilməyən tanınmış həkim Dilqəm Məhərrəmov yeni yola əl atıb.

“Qafqazinfo”nun əldə etdiyi məlumata görə, D.Məhərrəmov Azərbaycan Tibb Universitetində əcnəbi vətəndaşlar üçün keçirilən rezidentura pilləsinə qəbul imtahanında iştirak edib. Müxtəlif ixtisaslar üzrə sənəd təqdim edən 41 namizəd arasında onun da olması marağa səbəb olub. D.Məhərrəmov və digərləri yalnız Azərbaycan dili imtahanında iştirak ediblər və daha sonra müsabiqəyə buraxılıblar.

Onun əcnəbi ölkə vətəndaşı olmasına dair məlumat indiyədək ictimailəşməmişdi. D.Məhərrəmovun Gürcüstan vətəndaşı kimi imtahanda iştirak etməsi məlum olub.

O da iddia edilib ki, Azərbaycan Beynəlxalq Universitetində təhsil almış D.Məhərrəmovun, ümumiyyətlə, plastik cərrah kimi təhsili yoxdur.

Qeyd edək ki, ötən ilin oktyabrından başlayan plastik cərrah qalmaqalında ən çox adı çəkilən həkimlərdən biri də Dilqəm Məhərrəmovdur. “Baku Medical Plaza”da bir çox məşhur şəxsləri əməliyyat etmiş D.Məhərrəmovun daha sonra plastik cərrah kimi fəaliyyətinə qadağa qoyulmuşdu. Belə ki, Səhiyyə Nazirliyi plastik cərrahiyyə ixtisası üzrə praktik tibb fəaliyyəti göstərməyə icazəsi olan həkimlərin siyahısını açıqlayarkən onun adı olmayıb. Həmin vaxt D.Məhərrəmov açıqlama verərək qərarın onu təəccübləndirdiyini və adının yaxın vaxtlarda siyahıya əlavə ediləcəyini deyib. Lakin xeyli müddət keçsə də, bu baş verməyib.

Bu arada əlavə edək ki, ATU-ya Azərbaycan vətəndaşları üçün rezidenturaya qəbul imtahanları ən çətin imtahanlardan biri sayılır. Əcnəbi vətəndaşlar isə yalnız dil biliyi yoxlanılmaqla müsabiqəyə buraxılırlar. İmtahan nəticələrinin yaxın günlərdə elan ediləcəyi bildirilir.

Onu da qeyd edək ki, D. Məhərrəmovun həyat yoldaşı Nərgiz Əhmədova da plastik cərrahdır və sözügedən siyahıda adı yoxdur.

***

Dilqəm Məhərrəmov saytımıza açıqlamasında Tibb Universitetində əcnəbi vətəndaşlar üçün keçirilən rezidentura pilləsinə qəbul imtahanında iştirak etməsi ilə bağlı məlumatı təsdiq edib. O bildirib ki, əslən azərbaycanlı olan Gürcüstan vətəndaşı kimi imtahana qatılıb:

“Mən tibb üzrə fəlsəfə doktoruyam, 2002-2003-cü illərdə Azərbaycan Tibb Universitetində cərrahiyyə üzrə internatura, 2004-2007-ci illərdə Akademik Topçubaşov adına Elmi Cərrahiyyə Mərkəzində cərrahiyyə üzrə aspirantura təhsili almışam. Paralel olaraq müştərək şəkildə Alma-Atı şəhəri Sızqanov adına Milli Elmi Cərrahiyyə Mərkəzinin Plastik, estetik və rekonstruktiv cərrahiyyə şöbəsində təhsil almışam. Aidiyyəti üzrə bütün sənədlər Tibb Universitetinin rezidentura şöbəsinə də təqdim edilib”.

Aslan Vəliyev