Oksford Universitetinin alimləri sosial canlılara xas olan üstünlükləri və çatışmazlıqları öyrənən ilk tədqiqat işini həyata keçiriblər. Tədqiqat heyvanlar aləmindən 151 növü və insanları əhatə edib.
Oxu.Az bu barədə Gazeta.ru-ya istinadən xəbər verir.
Məlumata görə, tədqiqatçılar sosiallaşma və nəsil ömrü, fərdi həyat müddəti və reproduktiv dövr də daxil olmaqla müxtəlif həyat dövrü xüsusiyyətləri arasındakı əlaqənin hərtərəfli qiymətləndirməsini təqdim ediblər.
Nəticələr göstərib ki, daha sosial növlər adətən daha uzun yaşayır, cinsi yetkinliyi təxirə salır və tək növlərə nisbətən daha uğurla çoxalır.
Sosial növlər dəyişən mühitə daha pis uyğunlaşsalar da, qrup olaraq dayanıqlı qalırlar.
Tədqiqat, həmçinin göstərib ki, sosiallıq heyvanların yaşlandıqca çoxalma və ya sağqalma qabiliyyətinin azalmasına təsir edir. Məsələn, sosial müttəfiqlər bir-birlərini yırtıcılardan qorumağa kömək edə bilər, lakin sosial iyerarxiya və münaqişələrdən yaranan stressin əks-təsir yaratması mümkündür.
Alimlərin sözlərinə görə, insanlar üçün daha çox sosiallaşmanın üstünlükləri COVID-19 pandemiyasının səbəb olduğu qlobal təcriddən sonra daha aydın olub.
