“Kəndinə qayıt” verilişinin yeni buraxılışı yayımlanıb.
Verilişin budəfəki sayında Xızı rayonuna səyahət edilib.
Xızı rayonunun 15 598 nəfər əhalisinin 51,4 faizi şəhərdə, 48,6 faizi isə kəndlərdə yaşayır. Verilişdə Xızı sakinləri onları narahat edən problemlərdən söz açıblar. Belə ki, sakinlərin sözlərinə görə, rayonda iş çox olsa da, maaş azdır:
“İstixanalarımız, zavodlarımız var. 48 binadan ibarət şəhərcik tikilir və orada 700-800 nəfər işləyir. Amma gəl gör ki, maaş azdır, 350 manat nə puldur?!”
Rayonun Altıağac qəsəbəsinin sakinləri yaşadıqları ərazidə aptekin və bankomatın olmamasından da şikayətçidirlər.
“Təqaüd alanlarımız, xəstələrimiz var. İnsanlar qəsəbədə bankomat olmadığına görə təqaüdlərini ala bilmirlər. Pul çıxarmaq üçün rayon mərkəzinə getməliyik, ora qışda getmək çətin olur”, – deyə qəsəbə sakini narazılığını dilə gətitib.
Rayonun ən məşhur tarixi simvollarından biri Xızının Altıağac qəsəbəsində quraşdırılan 17-18-ci əsrlərə aid kilsə zəngidir. Sözügedən zəng fövqəladə hallar zamanı əhalini xəbərdar etmək üçün çalınır. Kənd sakini bildirib ki, şəhərdən gələn bəzi qonaqlar həmin zəngi icazəsiz çalaraq insanları narahat edirlər.
Ətraflı Baku TV-nin süjetində:
Xızıda maraqlı qəsəbə: Buranın tarixi simvolu yerli sakinləri necə qorxudur?
