“İqlim dəyişikliyi qida təhlükəsizliyini, su qıtlığını sürətləndirir və torpağın deqradasiyasına, eyni zamanda insanların yerdəyişməsinə səbəb olur”.
Oxu.Az xəbər verir ki, bu barədə Azərbaycan xarici işlər naziri Ceyhun Bayramov COP29 konfransı çərçivəsində keçirilən “İqlim və Sülh: Heç kim arxada qoymamaq naminə birgə fəaliyyət” adlı Yüksəksəviyyəli Paneldə çıxışı zamanı deyib.
Nazir qeyd edib ki, bu hadisələr tez-tez qeyri-sabitliyin dərinləşməsinə səbəb olan münaqişələr üçün katalizator rolunu oynayır:
“Münaqişələr və onların nəticələrinin infrastruktura, torpağın deqradasiyasına və biomüxtəlifliyə dağıdıcı təsirləri iqlim böhranını daha da artıracaq və sülhə, dayanıqlığa və inkişafa xələl gətirən pis dövr yaradacaq”.
“Bakı İqlim və Sülh Fəaliyyəti Mərkəzi həssas regionlarda, xüsusilə kiçik adalarda inkişaf etməkdə olan dövlətlərdə iqlimə uyğunlaşma və dayanıqlılığı dəstəkləmək üçün maliyyə və texniki resursların səfərbər edilməsini təşviq etmək üçün bu vədləri konkret tədbirlərə çevirməyə olan bağlılığımızı təcəssüm etdirir. İqlim dəyişikliyinin bir-birinə qarışmış böhranını və qarşıdurma tələbini, sarsılmaz həmrəyliyimizdən və təcili tədbirlərdən başqa heç nə həll edə bilməz”, – deyə nazir əlavə edib.
Mərahim Nəsib
