Məşhur hindistanlı aktyor Saif Əli Xan Mumbaydakı mənzilinə soxulan bir cinayətkar tərəfindən altı bıçaq yarası alıb.
Oxu.Az-ın verdiyi məlumata görə, bu barədə Hindistanın hüquq-mühafizə orqanlarından məlumat verilib.
Bildirilir ki, cinayətkar oğurluq məqsədilə səhər erkən saatlarda Mumbayın prestijli rayonu Bandrada yerləşən Xanın mənzilinə daxil olub. Həmin vaxt mənzildə aktyorun həyat yoldaşı – Bollivud aktrisası Karina Kapur, onların dörd və səkkiz yaşlı iki uşağı və xidmətçi olub.
Aktyor xəstəxanadadır, həyatı üçün təhlükə yoxdur, lakin bıçaq yaralarından biri onurğa sütununun yaxınlığından keçib. Həkimlər artıq bir neçə saatdır davam edən əməliyyat aparırlar.
Cinayətkar qaçmağa müvəffəq olub, polis onu axtarır. Hadisə ilə bağlı araşdırma başlanılıb.
