Vətəndaşların Böyükşor-Pirşağı avtomobil yolunu rahat və təhlükəsiz şəkildə keçməsini təmin etmək məqsədilə, Azərbaycan Avtomobil Yolları Dövlət Agentliyi tərəfindən yolun 1,3, 6,5 və 7,7-ci kilometrlik hissələrində yeni yerüstü piyada keçidlərinin tikintisi işləri həyata keçirilir.
Agentlikdən Xezerxeber.az-a bildirilib ki, yeni avtomobil yolunun 1,3-cü kilometrlik hissəsində inşa edilən yerüstü piyada keçidinin uzunluğu 46,9 metr, 6,5-ci kilometrlik hissəsində uzunluğu 42,2 metr, 7,7-ci kilometrlik hissəsində isə 47 metr təşkil edir. Keçidlərin yol səviyyəsindən hündürlüyü 5,5 metr, hərəkət hissəsinin eni isə 2,5 metrdir.
Layihə üzrə keçidlərdə 23,2 metr uzunluğa malik pandus hissələr də yaradılır. Pandus hissənin ümumi eni 3,8 metr, hərəkət hissəsinin eni 1,65 metr olacaq.
Piyada keçidləri aşırım və panduslar monolit dəmir-beton möhkəmləndirilmiş süni (geocel) əsaslı bünövrələrdən, aşırım, aşırım dayaqları, pilləkənlər və pilləkən dayaqları metal konstruksiyadan ibarət olmaqla layihələndirilib. Pandus hissələr isə monolit dəmir-beton sütunlardan, eninə və uzununa rigellərdən, hərəkət hissəsini təşkil edən tavadan ibarət olacaq.
Təhlükəsizlik səbəbi ilə hərəkət hissəsinin hər iki tərəfinə metal məhəccərlərin qoyulması nəzərdə tutulub.
Comments are closed.