Dünyanın ən qədim daşları Kanadada tapılıb

Ottava Universitetinin kanadalı alimləri Kvebekdəki Nuvvuagittug yaşıl daş kəmərində qaya birləşmələrinin rekord yaşda olduğunu təsdiqləyiblər.

“Report”un xəbərinə görə, bu barədə araşdırma “Science” elmi jurnalında dərc olunub.

İki radioizotop təyinetmə üsulu eyni nəticəni göstərib – 4,16 milyard il. Kəşf uzun müddətdir davam edən elmi mübahisəyə son qoyub. Əvvəllər bu formasiyaların yaşının 3,8 ilə 4,3 milyard il arasında olduğu təxmin edilib.

Yeni məlumatlar təsdiq edib ki, Nuvvuagittug qayaları Kanadanın şimal-qərbindəki məşhur Akasta gneys kompleksindən (4 milyard il) daha qədimdir. Qədim qayaların tədqiqi alimlərə gənc Yerdəki şəraiti, ilk tektonik plitələrin əmələ gəlməsi proseslərini və həyatın mənşəyinin mümkün mexanizmlərini başa düşmək üçün açar verir.

Bununla belə, sonrakı araşdırmalar gözlənilməz bir maneə ilə üzləşib. Yerli “Inuit” icması vandalizm hadisələrindən və qaya parçalarının qeyri-qanuni onlayn satışından sonra nümunə götürməyi müvəqqəti olaraq qadağan edib.