Ermənistan keçmiş hərbçini Rusiyaya təhvil verməyib

Ermənistan polisi Rusiya-Ukrayna müharibəsində iştirak etməkdən imtina edən keçmiş hərbçi Semyon Subbotini Rusiyaya təhvil verməyib.

“Report”un məlumatına görə, bu barədə “Novaya qazeta” adlarını çəkmədiyi hüquq müdafiəçilərinə istinadən xəbər verib.

Onların sözlərinə görə, 25 yaşlı Subbotin əvvəllər İvanovo vilayətinin Teykovo şəhərində strateji təyinatlı raket qoşunlarında radiotelefonçu-atıcı kimi xidmət edib. O, 2024-cü ilin sentyabrında “Meşə ilə gedin” layihəsinin köməyi ilə Rusiyadan çıxıb.

Ermənistanda Subbotin qeyri-qanuni olub, çünki Rusiyada ona qarşı hərbi hissəni özbaşına tərk etmə maddəsi (337 CM) ilə cinayət işi açılıb və axtarışa verilib.

Bundan əlavə, hüquq müdafiəçilərinin bildirdiyinə görə, Subbotin Ermənistana onu ölkədən çıxarmaq və ya ona təzyiq göstərmək istəyən insanların gəldiyini öyrənib. Nəticədə Subbotin ölkədə leqal şəkildə qalmaq üçün Ermənistan polisinə müraciət edib.

Ermənistan hakimiyyəti Rusiyanı bu barədə məlumatlandırıb.

“Bu gün Subbotinin 72 saat saxlandığı həbs kamerasına Rusiya hərbçiləri gəlib və proseduru pozaraq onu aparmaq istəyiblər”, – deyə hüquq müdafiəçiləri bildiriblər.

Onların sözlərinə görə, oğurlanma riski ilə bağlı polisə və prokurorluğa müraciət ediblər. 72 saatlıq saxlanma müddəti bitdikdən sonra Subbotin azad edilib.